Når ein kjem inn i lokala til Glasopor i Skjåk, slår det ein at her var det nytt og flott. «Fyrsteinntrykket er viktig, veit du» seier Inge Gjerdet, han jobbar som produksjonsleiar i bedrifta. Han tek vel imot utsendte frå næringskontoret og miljø og næringsutvalet. Han og gründeren og fabrikk og utviklingssjefen, Svein Gudbrand Lund, fortel om korleis dette industrieventyret starta.

 

Etter mange år i jobben hadde byggmester Svein G. Lund begynt å slite med ryggen, og han begynte å tenke på å finne på noko nytt. I 2002 slutta han i byggebransjen og starta opp den fyrste glasopor fabrikken i heimbygda si. Miljøtankegangen har heile tida vore i bakhovudet og sjølve bygga er også resirkulerte. Administrasjonsbygget var før havnefogden sitt kontor i Oslo, og hallen var tidlegare eit bussvaskeri på Lillestrøm. Sidan den spede starten i 2002 har Glasopor vakse seg frå ei lita gründerbedrift til ei million bedrift med miljø og bærekraft i fokus.

 

Glasopor er eit lettfyllings- og isolasjonsmateriale som vert laga av resirkulert emballasjeglas. Før var det mest knuste glaset som vart levert til gjenvinning eit problem fordi det ikkje er mogleg å produsere ny glasemballasje av det, men med utviklinga av Glasopor kunne dette materialet i staden kome til nytte, og samtidig løyse problematiske byggeprosjekt. 

 

 

Dei unike eigenskapane til Glasopor gjer det spesielt godt egna for den norske marknaden med vanskelege grunnforhold, og røft klima med store temperatursvingingar. For å overtyde byggebransjen om at Glasopor var vegen å gå, reiste Lund rundt til byggeplassar og demonstrerte materialet i praksis. Det fyrste året hadde den vesle bedrifta åtte tilsette og omsette for 600 000 kroner.

 

I 2006 kjøpte Norsk Glassgjenvinning, som har kontrakt med alle kommunane i landet om innsamling av glas- og metallemballasje, seg inn som investor i Glasopor. I 2012 tok dei over heile verksemda, og ekspanderte same året med ein fabrikk nummer to. Denne ligg i Onsøy utanfor Fredrikstad, og er direkte knytt til gjenvinningsanlegget der innsamla glasavfall frå heile landet vert samla. Det finaste glaset blir til ny emballasje, resten blir glasopor.

 

I dag omsett selskapet for omlag 100 millionar kroner i året på Glasopor skumglass, og har over 30 tilsette i produksjonen Skjåk og Fredrikstad. 14 av desse arbeider i Skjåk, og bedrifta sysselsett enda fleire indirekte gjennom blant anna transportsektoren. Lund er svært medveten om å nytte lokale tenester og varehandel for å bevare shillingane lokalt, som han seier. Dette utgjer opp mot 12-15 millionar kroner i året. Til og med kaffen vert kjøpt lokalt, og det går ein del kaffi i Glasopor sine lokalar. 

 

Miljøfokuset er fortsatt ein viktig del av Glasopor, og i fjor kutta fabrikken i Skjåk CO2-utsleppa heilt og reduserte den samla energibruken sin med 30 % ved å bytte ut dei gassdrivne smelteomnane og gå over til ”stuttreist” straum. Skjåk Energi kan levere og har i dag den billigaste straumen. Det grøne skiftet er eit moteord som blir nytta mykje nå for tida. "Her er det 90 % som pratar om det og 10 % som gjer noko med det", seier Svein Gudbrand. Nyleg vart Glasopor nominert som ein av tre bedrifter i verda til Kanthal Award, ein stor innovasjon og miljøpris. Dei nådde ikkje heilt opp, men det er fantastisk at ei bedrift i Skjåk blir internasjonalt anerkjent på denne måten. Lund fortel at dei var i Amerika under utdelinga av prisen. Sjå nominasjonsfilmen her.