Skjåk barne- og ungdomsskule

Verdigrunnlaget for skulen tek utgangspunkt i visjonen «Robust og positiv». Vi arbeider kontinuerleg med praksisen vår for å skape inkludering, mangfald og likeverd både fagleg og sosialt. Målet er å få ein meir praksisretta skulekvardag for fagleg og sosial læring. Praktisk, relevant og utviklande praksis skal skje med tydelege elevmedverknad.

Skrive- og leseopplæringa er eit område vi vil rette stor merksemd på i vår praksis, og vi har hatt eit samarbeid med Skrivesenteret som har rettleia oss i dette arbeidet. Vi skal bli betre til å lese og skrive, noko som blant anna betyr meir øving/trening både på skulen og heime.

Vi arbeider kontinuerleg med skulemiljøet slik at skulen vår skal bli ein god og trygg plass å vera for alle. Med oppvekstreforma er vi i gang med å bygge laget rundt barnet, i eit samarbeid med alle som arbeider for og med barn og unge. For å få til dette er det viktig at vi har eit godt samarbeid med heimane. FAU blir viktige i dette arbeidet, og vi vonar at alle kan vera med å gjera sitt for at vi skal nå måla våre.

Samarbeidsutvalet

Samarbeidsutvalet er det øvste rådsorganet på skulen og har rett til å uttale seg om alle saker som gjeld skulen.

Samarbeidsutvalet er samansett av to lærarar, ein av andre tilsette ved skulen, to elevar, to representantar frå foreldrerådet og to frå kommunen der den eine skal vera rektor og den andre frå Kultur og oppvekst.

Skulemiljøutval

Alle grunnskular skal ha eit skulemiljøutval. I skulemiljøutvalet skal elevane, foreldrerådet, dei tilsette, skuleleiinga og kommunen vera representerte. Det skal vera samansett slik at elevane og foreldra til saman er i fleirtal. Skulemiljøutvalet ved Skjåk barne- og ungdomsskule kan vera det same som samarbeidsutvalet, men med berre ein lærar.

Elevrådet

Elevrådet er samansett med ein til to representantar frå kvart steg. Dei har møter to gonger i månaden. Elevrådskontakten skal hjelpe og rettleie elevrådet og har møte og talerett på møta.

Foreldreråd

Foreldrerådet er alle foreldra/føresette på skulen. Dei vel representantar frå kvar klasse, klassekontaktar, og dei dannar foreldrerådets arbeidsutval, FAU.

Hovudoppgåva for klassekontaktane er å hjelpe til med å gjera forholda så gode som råd er for elevane og klassa, og arbeide for å få foreldra med i eit positivt samarbeid med skulen.