Det er politiet som sender ut test av Nødvarsel på mobil. Samtidig testar Sivilforsvaret tyfonane med signalet «Viktig melding – søk informasjon».

Varslingsøvinga den 14. januar skjer over heile landet, rundt kl. 12. Det betyr at mobiltelefonar i heile landet vil vibrere og spela av eit høgt lydsignal, samtidig som tyfonane uler.

Del gjerne informasjon om varslingsøvinga med dei næraste, slik at flest mogleg er førebudde og veit at dette berre er ein test.

Testen blir sendt ut over mobilnettet i heile landet. Alle nyare og oppdaterte mobiltelefonar og einingar som er i Noreg og er kopla til 4G/5G, kan ta imot testen.

Dersom du ikkje ønskjer å ta imot testen, må du setje telefonen i flymodus eller slå han heilt av i god tid før og etter klokka 12 den 14. januar. Lydlaus, låg lyd, dempa varsling og liknande blir overstyrte.

Nødvarsel på mobil blir testa for heile befolkninga både for å gjere folk kjende med korleis det opplevast å få eit Nødvarsel, og for å sikre at systemet fungerer som det skal.

I ein reell situasjon inneheld eit nødvarsel informasjon om kva som skjer, og kva du bør gjere for å verne deg sjølv.

Testing av tyfonane blir gjort for å avdekkje tekniske feil og for å gjere folk kjende med lyden og signalet. Signalet som blir testa under varslingsøvinga heiter «Viktig melding – søk informasjon» og består av tre seriar med tute-lydar med eitt minutts pause mellom seriane. Høyrer du dette signalet, betyr det i praksis at du skal søkje informasjon. Informasjon om kva som skjer og korleis du skal forhalde deg blir gitt gjennom ulike medium, til dømes radio, TV, myndigheitenes nettsider og sosiale medium.