Innlandets Matløfte
Ordførar Edel Kveen signerte matløftet, og fekk overrekt beviset frå Turid Windjusveen Olsen hos Statsforvaltaren i Innlandet. Ordføraren peika på at arbeidet både er eit naturleg framhald av den sterke lokalmattradisjonen i bygda og starten på ei meir systematisk satsing i heile organisasjonen.
Turid Windjusveen Olsen frå Statsforvaltaren i Innlandet, og Ordførar Edel Kveen.
Skjåk kommune
Kva er Matfylket Innlandet og Innlandets Matløfte?
Matfylket Innlandet er ei langsiktig satsing som skal bygge Innlandet som ein sterk matregion. Arbeidet skal styrke koplinga mellom landbruk, mat og reiseliv, og er Innlandet si oppfølging av regjeringa sin strategi Matnasjonen Noreg.
Satsinga fungerer som ein paraply for prosjekt og tiltak som saman skal få både private og offentlege aktørar i Innlandet til å bruke meir mat frå eigen region. Auka bruk av lokal mat styrkjer sjølvforsyning og beredskap, skapar verdiskaping og arbeidsplassar, reduserer klimaavtrykket og tek vare på matkultur og tradisjonar.
Innlandets Matløfte er eit sentralt verkemiddel i denne utviklinga. Når ein aktør signerer matløftet, forpliktar ein seg til å ta i bruk meir lokal mat, synleggjere matkunnskap og samarbeide om berekraftige løysingar. Samstundes skal ein bli meir medviten om kva ein allereie er gode på – og kva ein ønskjer å bli betre på.
Gjennom signeringa tek Skjåk kommune på seg forpliktingar innan seks hovudområde:
- samarbeide om ein berekraftig verdikjede for sunn mat og drikke
- formidle råvarekunnskap, tradisjonar og innovasjon
- servere norsk mat og drikke på eigne arrangement
- løfte fram smakar frå heile Innlandet
- utnytte sesongvariasjonar i råvarer og produkt
- framsnakke yrka i matverdikjeda – frå jord til bord
Bygger vidare på det vi allereie er gode på
Skjåk kommune har frå før eit sterkt engasjement for lokal mat, tradisjonar og råvarekunnskap. Institusjonskjøkkenet produserer det aller meste av maten sjølv – med fokus på norske og regionale råvarer og med ei aktiv satsing på å redusere matsvinn.
Barnehagane nyttar naturen i hausting og jakt, medan skulen løftar fram tradisjonsmat og råvarekunnskap gjennom faget mat og helse. Bismotunet har kantinedrift ved Skjåk barne- og ungdomsskule og Jotunheimen privatistskule, som bidreg til å styrke lokal matformidling.
Tiltaka i Matløftet byggjer difor vidare på eit sterkt fundament – og skal bidra til å løfte arbeidet endå meir.
Eit løft for berekraft, matglede og lokal verdiskaping
Gjennom signeringa av Innlandets Matløfte viser Skjåk kommune tydeleg ansvar og engasjement for lokal verdiskaping, matsikkerheit og berekraft. Satsinga skal styrke lokal matproduksjon, bidra til betre folkehelse og gi kommunen meir samordna, berekraftige løysingar – frå jord til bord.
Tiltak i Skjåk kommune
For å følgje opp Innlandets Matløfte har Skjåk kommune vedteke sju tiltak som skal styrke bruken av lokal mat og samarbeidet på tvers av einingar:
- Styrke institusjonskjøkkenet som nav for matservering, ernæringskunnskap og berekraftig matproduksjon.
- Kantinedrift basert på kompetansen ved institusjonskjøkkenet, med eit sunt og lokalbasert tilbod.
- Styrka innkjøpspraksis med tydelige krav og prioritering av lokalprodusert mat.
- Lokale råvarer ved arrangement der det er praktisk mogleg.
- Opplæring i ernæring for brukarar av helsetenestene.
- Felles matstrategi for betre samarbeid på tvers av kommunen.
- Synleggjering av leverandørar ved måltid frå institusjonskjøkkenet.
Frå venstre er Turid Windjusveen Olsen frå Statsforvaltaren i Innlandet, ordførar i Skjåk Edel Kveen, og kjøkensjef ved Skjåkheimen, Eva Kristin Bøje Kvandalsvoll.
Skjåk kommune