Djeveløya

“Djeveløya”
av Karin Thommesen

Debutromanen til Karin Thommesen er lagt til Jan Mayen, intet mindre! Dette er faktisk den fyrste romanen der handlinga er lagt til den norske polarøya 1000 kilometer vest for fastlands-Noreg. Eit plott med 18 menneske på ei øy langt frå alt anna, og der tåka tek over øya gjev grunnlag for ei spennande og klaustrofobisk handling. Romanen er rett så velskriven, og ein kan til og med plukke opp eit og anna av lærdom om den vulkanske øya som har høyrd til Noreg sidan 1930.

Mayday

«Mayday» og «Snøleoparden» 
av Grethe Bøe

Bøkene handlar om jagarpiloten Ylva Nordahl. I begge bøkene blir ho fanga i usannsynleg ville historier om det som diverre kanskje ikkje er så usannsynleg vill storpolitikk. 

Den fyrste boka har handlinga i iskalde omgjevnader på den russiske tundraen, medan den andre handlinga er minst like iskald på og rundtSvalbard. Det er meir eller mindre umogleg å legge frå seg desse bøkene når ein fyrst har starta å lese. 

Den stille uke

«Den stille uke»
av Sven Petter Næss 

Dette er debutromanen til Sven Petter Næss der ein for fyrste gong får møte den joviale Kripos-etterforskaren Harinder Singh. Sidan har det vorte seks romanar til om etterforskaren. Dette er klassisk politikrim, men det aller beste er at Harinder Singh er ein ganske så normal og grei kar som det er forfriskande å lese om. 

Visst kjem han ut for mykje rart, men han er korkje forfylla, neddopa eller demoralisert slik dei fleste etterforskarar er i kriminalromanar. I «Den stille uke» er det sjølvsagt både drap, intriger og mykje spenning, og det heile går føre seg i påskeveka.

Mordene på Fleat House

«Mordene på Fleat House» 
av Lucinda Riley 

Det er trist at Lucinda Riley ikkje fekk leve lengre og skrive fleire kriminalromanar. Manuset til denne boka vart funne av sonen hennar etter at ho døydde, og vart deretter gjeve ut. Det høyrer med til historia at romanen var skrive 15 år før ho døydde, men at Riley ikkje forsøkte å få den gjeve ut. Romanen er ein heilt perfekt påskekrim for den som er glad i klassisk engelsk tv-krim slik som «Mord og mysterier». Handlinga skjer i Norfolk. Det er engelsk landsbygd, idylliske småbyar ved kysten, kostskule, tweed-antrekk, tedrikking og mord om kvarandre. Med andre ord ein perfekt kombinasjon for ein klassisk og god påskekrim.

Vi er fem

«Vi er fem» 
av Mathias Faldbakken

Ei tvers igjennom spinnvill bok om ein familie med mor, far, to born og ein hund – og leire. Denne boka er noko heile for seg sjølv, ei blanding av eventyr, horror, science fiction og rå realisme tilsett litt heimstaddikting. Romanen har vorte kalla ein bygderoman på speed som det er ein fest å lese. I 2019 fekk boka P2-lyttarane sin romanpris. Dette er ikkje nokon tradisjonell roman på noko vis, men om ein vil lese noko heilt utradisjonelt, rart og veldig spennande blir boka anbefalt på det varmaste.