Valkyrien Allstars

Marlo Grendehus i Skjåk laurdag 7. mars kl 19

Valkyrien Allstars har gått i nye retningar for kvar utgjeving, og blir rekna som pionerar innan den nye folkemusikken med sitt heilt eigne særpreg.
Bandet består av Tuva Syvertsen, Magnus Larsen Jr., Erik Sollid og Martin Langlie.

Saman lagar og arrangerer dei låtar som handlar om evig kjærleik og mysterium som aldri blir løyste. Både på plate og live byr dei på energi, inderlegdom og overraskande vendingar.

Vi opnar dørene kl 18, konserten byrjar kl 19.

Arr: Vennelaget Jan-Magnus Bruheim, Jakupscena, Skjåk folkebibliotek, Skjåk kommune - kultur med støtte frå Innlandet fylkeskommune

Billettar kjøper du på Tikkio.com

Are Kalvø kjem til SOLfestivalen i Skjåk

Marlo Grendehus i Skjåk fredag 6. mars kl 19

Are Kalvø er ein anerkjend norsk satirikar, forfattar og radioprofil som har sett tydelege spor etter seg i norsk humor og samfunnsdebatt. Han er særleg kjend for arbeidet sitt i NRK-radioen.

Frå 1993 til 2009 var Kalvø programleiar for Hallo i uken på NRK P2, eit populært satireprogram som med humor og skarpsyn tok for seg aktuelle hendingar og samfunnsspørsmål. Tidlegare hadde han òg vore programleiar i Nattradioen på NRK P1.

Kalvø har òg hatt stor suksess på scenen, mellom anna med soloframsyninga Berre bønder lengtar heim – ei personleg og humoristisk forteljing om forsøket på å byggje bru mellom by og land, og om å finne ut kva som eigentleg er best av dei to.

Billettar kjøper du på Tikkio.com

Lavskrike Lars Kurt Haugen

Perlevenner og fuglevenner

I 2026 skal Skjåk folkebibliotek ha ekstra fokus på fuglar. Under SOLfestivalen 2026 skal vi m.a. opne “Fuglebiblioteket”. Vi har kjøpt inn fleire fuglebøker og vi har skaffa eit stort fuglehus som skal stå utanfor Frøbiblioteket vårt. Rune og Jarleif har sagt ja til å ha fuglekassesnikkering og vi skal sette fram eit bord med perler. Her du kan perle ein fugl og kanskje får du ein “perlevenn” også. Vi skal også opne ei fotoutstilling med fine bilete av fuglar, her samarbeider vi med Lars Kurt Haugen og Gaute Meli. 

Kom gjerne med tips og idear til fuglesatsinga vår!

Johannes Alme

I påska 1952 mista 79 menn livet i ein forrykande orkan

Johannes Alme er eit kjent ansikt for mange i Skjåk. Han har hytte på Billingen og har tidlegare jobba i Skjåk kommune. Han har mykje kunnskap om ein av dei mest dramatiske hendingane i norsk kysthistorie. Under SOLfestivalen 2026 kjem og held foredrag om norsk selfangst og den ufattelege tragedien i Vesterisen i 1952.

Med ei brennande interesse for polarhistorie, formidlar han ikkje berre dei tørre fakta, men også dei menneskelege skjebnane bak overskriftene. 

Vesterisulukka utanfor Grønland
I april 1952 råkar ein av dei verste tragediane i norsk selfangsthistorie. Fem ishavsskuter – «Vårglimt», «Ringsel», «Brattind», «Pels» og «Buskø» – forsvinn i det harde vêrdraget i Vesterisen. 79 ishavsfolk misser livet. Uvêret kjem brått og nådelaust, og skutene får ingen sjanse til å berge seg. Heime sit familiar og ventar, medan rykta og uroa spreier seg. Først mange dagar seinare kjem den grufulle sanninga fram – skutene er borte for alltid.
Johannes Alme skildrar dramatikken, leitinga etter dei sakna og den djupe sorga som la seg over kystsamfunna. Eit sterkt og gripande foredrag om dei som sat att, om motet til ishavsfolket og om ein tragedie som aldri må gløymast.

Selfangsten - primærnæringa som forsvann
Foredraget er for alle som er interesserte i norsk historie, næringshistorie, kystkultur og korleis landet vårt har utvikla seg. Du får høyre om korleis selfangst har forma det norske samfunnet, særleg kystsamfunna på Sunnmøre og i Nord-Noreg. Johannes Alme viser korleis naturtilhøve, demokrati, politikk og rammevilkår har påverka denne næringa, og kor viktig ho har vore for arbeidsplassar, busetjing og velferd. I tillegg får du innblikk i kvinnene og familiane sine roller i selfangsten.
Vi får vidare høyre om det dramatiske vrakfunnet gjort av den islandske trålaren Videy hausten 2023.

Johannes Alme
Johannes Alme er 54 år og kjem frå ishavsbygda Brandal på Sunnmøre. Han har sjølv vore på selfangst, men kallar seg 98% landkrabbe. Han har samla og skrive mykje om hendingar i ishavet, både artiklar og bøker, og etter kvart ein mykje nytta foredragshaldar. Han er i dag næringssjef i Hareid kommune, føredragshaldar, forfattar – og truleg den personen i verda med størst kunnskap om norsk ishavshistorie. Han har tidlegare vore kommunalsjef for miljø- og samfunnsutvikling i Skjåk kommune.

Vel møtt til ei lærerik og gripande historisk reise!

Skjåk folkebibliotek måndag 2. mars kl 18

Espen og Stian Nicolaisen Privat foto

Trekkspelnerdar

Brørne Espen og Stian Nicolaisen er to lidenskapelege trekkspelarar som både trakterer instrumentet på høgt nivå og samlar på trekkspel med ekte entusiasme. Med sin gode kunnskap og interesse blir dei ofte – med eit smil – kalla trekkspelnerdar. Hjå dei møtest handverk, samlarglede og rein speleglede i eitt og same drag. 

På biblioteket kan du både sjå og høyre utvalde trekkspel frå den mangfaldige samlinga deira, og få høyre historier knytte til instrumenta. Konserten passar for både små og store, anten du er nysgjerrig førstegongslyttar eller har eit langt forhold til trekkspelmusikk. Dette blir ei uformell og levande oppleving der publikum kjem tett på både musikken og instrumenta.

Kom på biblioteket for å sjå og høyre nokre av trekkspela frå samlinga deira. Velkomne!

Enkel servering - Inngang kr 100 (til aktørane)

Skjåk folkebibliotek tysdag 3. mars kl 19