Hjartesone!

Hjartesone er eit tiltak som Trygg Trafikk, Statens vegvesen og Innlandet fylkeskommune samarbeider om, fordi det er ei stor utfordring at altfor mange køyrer barna sine heilt fram til skulegarden. Dette gjer det meir utrygt for andre barn som ferdast blant bilar som rygger og sjåførar som er stressa.
– Å få redusert foreldre­køyringa skal gjere det tryggare og meir attraktivt for barn å gå eller sykle til skulen, seier regionleiar i Trygg Trafikk Innlandet, Marianne Mittet Solbraa.
– Vi ønskjer at foreldre og føresette skal la barna gå – og etter kvart sykle – sjølve dersom det er mogleg.
– Om det kjennest for utrygt, kan du kanskje setje av barnet ditt eit lite stykke unna skulen og la det gå den siste biten? Litt frisk luft og rørsle før skuledagen startar er gull verdt.

Trygg Trafikk

Lenke til Trygg Trafikk og Hjartesone

Den største utfordringa skulane peikar på, er at foreldre ikkje følgjer hjartesone-anbefalingane og framleis køyrer barna heilt inn til skulebygget.
For å skape ei god Hjartesone finst det fleire moglege tiltak. Hovudsakleg handlar arbeidet om å påverke åtferd og haldningar, men det kan òg vere aktuelt med mindre fysiske tiltak.
Målet er at det skal vere minst mogleg bilkøyring i nærleiken av skulen. Tek du utfordringa?
Bruk gjerne litt av sommarferien til å øve på skulevegen saman med barnet ditt – eller finn ein trygg stad å setje det av, slik at det kan gå det siste stykket sjølv. Lykke til!

Trygg Trafikk sine tips til å øve på skulevegen:

1. Gå skulevegen åleine først og kartlegg stader som kan vere vanskelege eller farlege.
2. Ta dykk god tid og gå fleire turar saman.
3. Snakk om det som skjer langs vegen og om farar som kan oppstå.
4. La barnet etter kvart ta meir styring sjølv.
5. Ha det triveleg saman!

Lykke til!